„Собранието е место каде политичките партии треба да разговараат. Сите документи од предлогот ќе бидат испратени во Собранието, таму се сите партии, ќе имаат состаноци, ќе расправаат за заклучоци во врска со европскиот предлог кој го имаме добиено од ЕУ. Собранието ќе одлучи и ќе ја даде одлуката на Владата да ја спроведе“, рече денес шефот на Владата Димитар Ковачевски одговарајќи на прашањето дали ќе има средба со опозицијата.
„Со Мицкоски имавме средба а и со Села и Касами. Координаторите на пратеничките групи и претставници на помалите политички партии ќе разговараат за заклучоците кои Собранието треба да ги донесе во врска со францускиот односно европскиот предлог. Тие заклучоци ќе бидат испратени до Владата и Владата ќе постапи според нив“, рече Ковачевски на прес-конференцијата со Шарл Мишел.
Во врска со протестите премиерот рече дека секој граѓанин може да го изрази својот став во рамки на законите. „Вчера имавме четири повред полицајци, и денес се случува нешто што не доликува на земја членка на НАТО и кандидат за ЕУ“, рече Ковачевски.
Според премиерот, организаторите на протестите пред Владата се партии кои се против членство на Македонија во НАТО и ЕУ.
„Никогаш досега не се случило да протестираат луѓе кои носат качулки и да се гаѓа по полицијата. Тоа е недозволиво за држава која го помина 27 април и тоа не смее да ни се повтори. Никому не му се криви полицајците“, рече тој. (С.К.)