„Државните успеси и позиционирањето на држава на меѓународен план се одличен пример, најсилен доказ и јас би рекол најголем показател за резултатот на државничките политики на СДСМ. Без разлика дали преку дипломатија, политика, економија, култура Северна Македонија ја поставивме како светилник на напредок и рамноправен партнер на глобалната сцена“ рече премиерот Димитар Ковачевски на трибината „МК во ЕУ до 2030“ во Куманово.
Тој додаде дека од земја во изолација во времето на ВМРО-ДПМНЕ, со СДСМ станавме членка на НАТО и почнавме преговори со ЕУ.
„Од заробена држава со ВМРО-ДПМНЕ, станавме земја – рамноправен партнер на САД и ЕУ со СДСМ. Од земја корисник на мировни мисии, со СДСМ станавме земја домаќин на регионални договори. Од земја извор на кризи со СДСМ станавме пример за мирно решавање на конфликти и дома и со соседите и тоа по пат на дијалог. Со СДСМ станавме фактор на регионална стабилност и пример во регионот, земја во која се депонирани потписите од договорите меѓу земјите од Западен Балкан во рамки на Берлинскиот процес“ рече Ковачевски.
Премиерот додаде дека опозициската ВМРО-ДПМНЕ нема учествувано во ниту една стратешка одлука и во ниту еден процес кој е значаен за иднината на земјата.
„Од независноста до денеска СДСМ е носителот на државничките процеси, на напредокот, на демократските промени и на остварувањето на стратешки цели, членство во НАТО и членство во ЕУ. Ние како земја сме имале среќа низ поновата историјата да имаме лидери како Глигоров кој инсистрирал мирно да ги решаваме предизвиците пред нас. И тогаш слични проблеми имале како ние денес. И тогаш опозицијата била против чекорите кои ги преземала тогашната Влада“ рече Ковачевски.
Тој додаде дека да не биле тие луѓе кои биле на власт во даденото време, ќе сме имале иста судбина со сите останати држави од бивша Југославија.