Разговорите со новото раководство ги водев сам. Во партијата сум 30 години и досега со сите сум имал одлично искуство и соработка. Со поранешниот претседател, Бранко Црвенковски не сум разговарал во последниот период, истакна претседателот на СДСМ и мандатар за состав на новата влада, Димитар Ковачевски при гостувањето на ТВ Сител.
Тој нагласи дека сè уште го нема составено владиниот кабинет за што ќе почне разговори од утре по што ќе направи и конечен избор.
„Јас сум човек со визија и интегритет. Тимот што беше одбран на Централниот одбор синоќа беше направен од мене. Владиниот кабинет не е комплетиран и во таа насока ќе почнам разговори од утре, истакна Ковачевски и додаде дека со нетрпение го очекува бугарскиот премиер, Кирил Петков во посета на Македонија.