Премиерот Димитар Ковачевски заедно со министерот за економија, Крешник Бектеши и министерот за земјоделство, шумарство и водостопанство, Љупчо Николовски денеска ја посетија фабриката за производство на месни производи „Пекабеско“. Ковачевски притоа истакна дека вакви успешни компании ѝ требаат на нашата економија, а Владата се грижи во време на голема непредвидливост наметната од економската и енергетската криза, преку антикризните мерки на компаниите да им обезбеди да ги зачуваат своите бизниси, но и вработените.

„Фабриката ‘Пекабеско’ е пример за резултатот што го даваат владините мерки, компанијата користи субвенционирано снабдување на струја и поради тоа месните производи од декември лани се намалени за 8 отсто. Преку владина поддршка компанијата има инсталирано и соларни панели, со што  задоволува дел од потребите за струја за нивните производствени капацитети“, соопштија од Владата.

„На сопствениците, целиот менаџерски тим и на работниците, во ‘Пекабеско’ им честитам на мисијата за квалитет, која ја држат во живот цели 44 години и кои создадоа препознатлив вкус преку месните производи кои освен на домашниот пазар, се извезуваат и во Србија, Босна и Херцеговина, Косово и Црна Гора, меѓутоа и во земјите од ЕУ“, рече Ковачевски при посетата на фабриката.
Зборувајќи за енергетската трансформација тој ја истакна важноста во ситуација на недостиг на енергенси. „Пекабеско е дел од таа енергетска трансформација. Со државна помош, преку Законот за поддршка на инвестиции, ова фабрика инвестира во нови технологии, во нови машини. Во моментов ‘Пекабеско’ претставува најсовремена фабрика за производство на месни производи во регионот, а притоа веќе има инсталирано и фотоволтаични централа од половина мегават, со планови за нејзино неколкукратно проширување“, посочи премиерот.
Р.Н.