Во Софија денеска започна состанокот на шефовите на влади на земјите членки на НАТО од Југоисточна Европа. После минатонеделниот вонреден самит на НАТО, продолжуваме со координација на заедничките безбедносни стратегии кон ризиците и заканите од војната во Украина и за зајакнување на регионалната соработка во земјите од Југоисточна Европа, порача македонскиот премиер Димитар Ковачевски на почетокот на самитот.
Во фокусот на состанокот, чиј организатор и домаќин е претседателот на Владата на Бугарија Кирил Петков, се предизвиците за регионалната безбедност во контекст на руската воена инвазија на Украина. Учесници се освен македонскиот премиер и бугарскиот домаќин, и премиерите на Романија Николае Чука и на Црна Гора Здравко Кривокапиќ.
На маргините на состанокот се очекува Ковачевски да има посебни средби со премиерите од регионот, при што за нас е од особена важност средба со бугарскиот колега Кирил Петков. Северна Македонија и Бугарија, како што беше навестено и од шефот на дипломатијата Бујар Османи, постигнале одреден напредок во разговорите за надминување на бугарската блокада за почеток на преговорите на Македонија за членство во ЕУ, меѓутоа како што нагласи Османи, се уште се далеку од конечно решение.
Македонската страна постојано истакнува дека секоја средба со бугарски претставници ќе биде користена за да се претстават нашите позиции и да се направи обид за доближување на ставовите на двете земји за постигнување на договор.