Ковачевски за Гласот на Америка: САД се еден од најзначајните партнери во унапредувањето на правосудниот систем во државата

Претседателот на Владата Димитар Ковачевски, во интервју за Гласот на Америка, зборуваше на повеќе теми, меѓу кои даде оценка за реализираните средби за време на неговата работна посета на САД, како и за забелешките од Вашингтон во врска со судството, како и состојбите со корупцијата и владеењето на правото.

Ковачевски во интервјуто се осврна на фактот дека „Северна Македонија постигна значаен напредок во последните 6 години во слобода на медиумите и се издигна за 19 места повисоко на скалата за слобода на говорот на светски ранг“.

„Тоа е навистина едно исклучително големо достигнување, заради демократскиот капацитет кој што го има оваа влада предводена од СДСМ и коалициските партнери. За време на посетата на САД исто така, стана збор за владеењето на правото и борбата против корупцијата. САД се еден од најзначајните партнери во унапредувањето на правосудниот систем во државата“, вели Ковачевски во интервјуто.

„Ги презентиравме сите закони кои што се изготвени, во делот на унапредување на борбата против корупцијата, владеењето на правото, инвестициите кои што се прават во правосудството, обезбедена е независност на судството“, оцени Ковачевски во интервјуто.

Според него, следи период на унапредување на состојбите.

„Она што е пред нас е унапредување на сите овие процеси, пред се тука мислам на зголемување на транспарентноста на целокупниот правосуден систем, кој што е независен“, вели шефот на македонската Влада.

Тој посочи дека е изгласан нов Кривичен законик, но и дека има голем број на закони кои што се во собраниска процедура.

„Најголемиот дел од нив блокирани од страна на опозицијата. Јас се надевам дека ќе изнајдат начин опозициските пратеници ако имаат забелешки да дадат на тие закони, доколку немаат забелешки тогаш едноставно да се дозволи да тече понатамошната процедура бидејќи сето тоа влијае на унапредување на системот“, вели Ковачевски.

Тој во интервјуто додава и оти е „многу значајно и што скрининг процесот на крајот ќе резултира со извештаи коишто се однесуваат на сите поглавја, вклучително и на поглавјето на владеењето на демократијата, владеењето на правото и тука ќе можеме да ги видиме точно сите терени кои што ќе треба да бидат исполнети во континуитет пред нас“.