За НоваТВ од Софија, Биљана Божиновска
Премиерите на Северна Македонија и Бугарија, Димитар Ковачевски и Кирил Петков копретседаваат со пленарната меѓувладина седница која денеска се одржува во претседателската резиденција „Бојана“ во Софија.
„Тоа што го постигнавме за само два дена ни дава мотив да веруваме дека ќе имаме вистински резултати од разговорите за многу кратко време“, рече на отворањето на пленарната меѓувладина седница, премиерот на Бугарија, Кирил Петков.
За претседателот на македонската Влада, Димитар Ковачевски, денешната работна средба е голем успех, бидејќи доаѓа само една недела по првата средба во Скопје, каде беше договорена соработка во повеќе области коишто значат подобра економска соработка, соработка на полето на образованието, инфраструктурата и иновациите, на се она што за граѓаните значи подобра комуникација, подобри врски и подобрување на економската соработка, со цел, како што рече, овој регион да стане регион на економски просперитет и подобар животен стандард за граѓаните.
„Од тие причини денес, нашите колеги од двете Влади, ќе работат на теми кои што се од областа на инфраструктурата, конкретно Коридорот 8, и во областа на патната инфраструктура, железничката инфраструктура и во делот на телекомуникациското поврзување, потоа во делот на поврзувањето во образованието, а кога го поврзуваме образованието ги поврзуваме младите, ја зголемуваме нивната мобилност“, рече Ковачевски и додаде дека тимовите од двете страни во текот на следните шест месеци заедно ќе управуваат со работните групи.
Во работните групи, покрај министрите од двете земји ќе учествуваат и претставници на Стопанските комори, претставници на деловните кластери и образовни институции, како и претставници на културните организации од двете држави.
„Сето тоа треба да не доведе, да покажеме пред Европа дека на Балканот може да се соработува и дека ќе преставуваме пример за успешна соработка и да бидеме пример како се зголемува и економската и образовната и културната соработка помеѓу државите“, рече Ковачевски.
Вториот работен ден на мекедонската владина делегација во Софија почна со тет-а-тет средба на премиерите Ковачевски и Петков и состанок на министерот за надворешни работи на Република Северна Македонија Бујар Османи и министерката за надворешни работи на Република Бугарија Теодора Генчовска.
По пленарната седница, на којашто ќе бидат презентирани резултатите од работните групи, ќе следува потпишување меморандуми и договори за соработка.
Работниот дел на заедничката седница на Владите на Република Северна Македонија и на Република Бугарија завршува со прес-конференција на премиерите Ковачевски и Петков на која пред новинарите и јавноста ќе ги презентираат резултатите од меѓувладината сесија.
Во попладневните часови претседателот на Владата Димитар Ковачевски, придружуван од членови на Владата, ќе има одделни средби со претседателот на Република Бугарија Румен Радев и со претседателот на бугарското Собрание Никола Минчев.
Официјалната посета на Бугарија, почна вчера со свечен државнички пречек на плоштадот „Александар Невски“ во Софија, каде двајцата премиери Ковачевски и Петков положија свежо цвеќе пред споменикот на „Непознат воин“ и пред споменикот на „Св. Кирил и Методиј“.
Потоа двете делегации присуствуваа на отворање на дописништво на МИА во Културно-информативниот центар во Софија, а првиот ден од работната посета двајцата премиери го завршија на државниот универзитет „Св. Климент Охридски“ во Софија.
За време на посетата на универзитетот премиерите Ковачевски и Петков имаа куса средбата и со ректорот проф. д-р Анастас Герџиков, на која меѓу, другото, се разговарало и за заедничкиот интерес на двете влади да ја охрабрат комуникацијата и соработката меѓу државните универзитети во Северна Македонија и Бугарија.
Премиерот Ковачевски, во Бугарија, е придружуван од првиот вицепремиер Артан Груби, заменик претседателот на Владата задолжен за економски прашања, Фатмир Битиќи, Славица Грковска, заменик на претседателот на Владата задолжен за политики за добро владеење, како и министрите, Бујар Османи за надворешни работи, министерот за финансии Фатмир Бесими, министетрот за економија Крешник Бектеши, министерот за земјоделство, шумарство и водостопанство Љупчо Николовски, министерот за образование и наука Јетон Шаќири, министерот за локална самоуправа Горан Милевски, министерката за култура Бисера Костадиновска-Стојчевска, министерот за транспорт и врски Благој Бочварски, министерот за животна средина и просторно планирање Насер Нуредини, министерот за информатичко општество и администрација Адмирим Алити, советникот за надворешни работи на Владата, Едмонд Адеми.