Во текот на изминатите денови Македонија бележи се поголем број на заразени лица со ковид-19, што се должи на брзото ширење на новиот сој омикрон. Во земјава во моментот се активни 20.250 случаи, а според податоците на Светската здравствена организација (СЗО) во светот се дијагностицирани над 340 милиони заболени. Од СЗО предупредуваат дека ризикот од омикрон останува многу висок.
Од почетокот на епидемијата досега во земјата се направени вкупно 1.741.085 милиони тестирања на ковид-19. Вкупната бројка на ковид-дијагностицирани лица во нашата земја од почетокот на епидемијата изнесува 254.857, бројот на оздравени пациенти е 226.409, на починати е 8.198, а бројот на активни случаи изнесува 20.250.
Бројот на потврдени случаи на инфекција со коронавирус во светот надмина 340 милиони луѓе, соопшти вчера СЗО.
Според информациите од завчера Светската здравствена организација добила податоци за вкупно 340.543.962 милиони заразени лица и 5.570.163 милиони починати.
Најголем број заразени со ковид-19 е регистриран на 20 јануари, кога во рок од 24 часа се идентификувани 3.933.319 милиони случаи. Најголем вкупен број се потврдени во САД – речиси 68,2 милиони. Следува Индија со 38,6 милиони случаи, потоа Бразил (23,4 милиони), Британија (15,6 милиони) и Франција (15,2 милиони). Најголем број починати од ковид-19 има во САД (852.334 лица), потоа Бразил, Индија, Русија и Мексико.
Светската здравствена организација вчера издаде соопштение за омикрон, во кое се наведува дека ризикот поврзан со оваа варијанта останува „многу висок“.
„Врз основа на достапните докази, ризикот поврзан со омикрон останува висок. Омикрон се шири многу побрзо од делтата, што доведува до големо ширење во заедницата, а со тоа и поголема инциденца, отколку што сме виделе во пандемијата претходно“, соопшти СЗО.