Во Македонија, заклучно со вчерашниот ден, има 955 случаи на ковид-19 од кои најмногу во Тетово – 285 и во Скопје – 275. Колку за споредба на растот, пред еден месец беа активни 130 во целата држава.
Тетово и Скопје вчера имаа ист број новозаразени, по 65, а двоцифрени број на нови случаи имаше и во Куманово (20) и во Гостивар (19). Триесет пациенти се оздравени, а починале четворица на возраст од 61 до 76 години. По Скопје и Тетово, висок број активни случаи имаат и Куманово (90), Гостивар (84), Битола (38), Дебар (29), Струмица (27), Кичево (23). Десет градови засега се без случаи на ковид-19.
Епидимиолошката служба на тетовскиот Центар за јавно здравје оцени дека за само еден месец од регион со спорадични случаи, Тетово е во фаза на широко распространета трансмисија на ковид-19 и се очекува бројот на новозаболени да расте уште повеќе.
– На 6 јули имаше шест случаи на домашно лекување, а сега има околу 220 во градот Тетово. Имаме по 30, 40 и вчера дури 60 позитивни случаи. Генерално, новите случаи не се вакцинирани. Од овие 220, само десетина имаат примено вакцина, изјави доктор Сузана Субашиќ, раководител на епидемиолошката служба.
Зголемениот број на случаи се должи на непочитување на мерките и протоколите, а инфицираните се од семејни прослави и потоа од ширење на контактите. Многу од заразените се дојдени од западните земји, појасни епидемиологот Субашиќ, кои по престојот во државава се тестираат за да може да заминат во земјите каде што работат. Голем дел од нив се млади лица и често се инфицирани, но без симптоми.
Во Тетово има и најмногу хоспитализирани болни од ковид-19. Од вкупно 105 во целата држава, во тетовската клиничка болница лежат 32 пациента – шест повеќе од претходниот ден.
На Инфективната клиника во Скопје има 20, исто толку во гостиварската болница и десет во Општата болница во Куманово. Во болницата во Струмица има седум пациенти, шест во Прилеп, по четворица се хоспитализирани во Битола и Штип и по еден во болниците во Велес и Струга.
Надлежните апелираат за помасовен одѕив за вакцинирање, како единствен начин да се надмине епидемијата во која од почетокот т.е. од минатиот февруари до сега бројот на ковид-дијагностицирани достигна 156.926, а починаа 5.501 луѓе.
Министерството за здравство соопшти дека заклучно со средата, една доза на вакцина против ковид-19 примиле 519.106 граѓани, а со две дози се имунизирани 409.186 лица.