Коронавирус, заклучно со вчера, е регистриран кај вкупно 201 лице во земјава. На Клиниката за инфективни болести беше испишан еден пациент од Дебар, кој во добра општа состојба и со два негативни теста е испратен на домашно лекување. Таква можност е најавена и една пациентка од Скопје чии два последователни тестови, исто така, се негативни. Како последица на Ковид-19 досега починаа тројца пациенти.
Најголем број за заразени лица се евидентирани во Скопје (123), по што следуваат Дебар (43) од кои двајца починати, Куманово (15) од кои еден починат, Штип (осум), Велес (три), Охрид (три), Кавадарци (два), Прилеп (два), Гостивар (еден) и Тетово (еден).
Нов случај на коронавирус е регистриран кај пациент од Тетово кој од 9 до 23 март престојувал во Заводот за рехабилитација во Скопје. По неговото враќање дома, поради зголемена температура, му бил направен тест и тој преку тетовското инфективното одделение е препратен на хоспитализација на Инфективната клиника во Скопје. Тим на епидемиолози во текот на вчерашниот дензема примероци за тест од 14 здравствени работници и четири пациенти кои биле во контакт со тетовецот.
Министерот за здравство Венко Филипче вчера најави дека од следната недела ќе има мобилни тестирања, а Куманово ќе биде еден од првите градови каде ќе се зголеми бројот на тестирања по мобилен пат.
Во Велес каде веќе се потврдени три случаи, министерот најави зајакнување на епидемиолошката служба со еден или двајца епидемиолози кои ќе бидат испратени во текот на денешниот ден, а следната недела и мобилна екипа.
Во текот на наредната недела, како донација, треба да пристигнат 500.000 маски и 20.000 тестови, реагенси за тестирање на коронавирусот. Филипче вчера рече дека добиле одговор од повеќе донатори, преку норвешката Влада за респираторни машини кои ги очекуваат на почетокот на април, а овие денови ќе добијат одговор и од кинеската амбасадата од која побарале донација пред неколку недели.
Засега прогнозите на надлежните остануваат дека пикот на вирусот ќе биде кон крајот на април и оти бројката на заболени ќе достигне до околу две илјади лица. Сепак, министерот најавува детална анализа за очекувањата и за временскиот интервал кога што би можело да се очекува. Анализата, како што посочи, би била готова во текот на викендот или на почетокот на следната недела.
Според министерот, вонредната состојба и мерките што се воведоа се сосема доволен механизам за постигнување на крајната цел и нагласи дека очекува резултат и од значајното зголемување на часовите на ограничување на движење, односно полицискиот час за време на викендот.
За да се спречи ширење на заразата за викендот ќе важат дополнителни рестриктивни мерки. Во сабота и недела за сите граѓани ќе биде забрането движењето од 16 часот до 5 наредниот ден.
Остануваат да важат и претходните забрани – полициски час од 21 до 5 часот и забраната за излегување надвор за постари од 67 години (од 11 до 5 часот) и за помлади од 18 години (од 21 часот до 12 наредниот ден).