Македонија е влезена во втор месец од првиот регистриран случај на коронавирус во земјава. Оттогаш бројката расте секојдневно расте и вкупниот биланс во земјава, според последните податоци, е 259 заболени лица, тројца излекувани и шест смртни случаи.
Според министерот за здравство Венко Филипче, зголемувањето на бројката на заразени е очекувано, но добро е, вели тој, што бројот на случаи се зголемува линеарно што значи дека здравствениот систем има капацитет да ги прими сите пациенти.
„Добро е што бројот на случаи се зголемува линеарно, а не експоненцијално, што значи дека секој ден имаме приближно еднакво зголемување, што сè уште му дава шанса на нашиот систем за одржливост и можност соодветно да ги прими и амортизира сите пациенти без притоа да бидат пренатрупани нашите капацитети“, оцени Филипче на вчерашната прес-конференција, притоа нагласувајќи дека, сепак, сè уште сме во една форма на војна против коронавирусот.
Министерот за здравство рече дека претстои најтешкиот период во кој се очекува да расте и бројот на заболени и на починати лица.
„Сите мора да бидеме свесни за тоа. Имаме и млад човек кој почина. Ова е доказ дека вирусот не штеди никој, никој не е имун, ниту заштитен од него. Стануваше збор за најтешката можна форма на клиничка манифестација на оваа болест“, рече Филипче, информирајќи за, досега, најмладиот починат пациент – 31 годишен маж.
Апелира дека заболените не смеат да се стигматизираат, а уште помалку луѓето во државен карантин за кои рече дека се прегледани од интернист и епидемиолог и оти досега нема ниту еден заболен меѓу нив. Моделот на државен карантин, како што рече Филипче, е модел кој го штити колективното здравје и здравјето на секој граѓанин.
„Овој модел мора да го поддржиме за доброто на сите. Ова се луѓе кои ги сместуваме во сосем добри, солидни услови и сите се прегледани. Постои процедура која што се следи, начин како се постапува со луѓето кои се сместуваат во карантините. Сите овие луѓе се прегледани од интернист и од епидемиолог, а досега нема ниту еден заболен од вирусот“, рече Филипче.
Неколку лица кои имале симптоми на болест се тестирани и истите се негативни, а кај нив е дијагностицирана настинка. Тие, како што информира Филипче, се во рамки на тој карантин, но настрана од сите останати лица.
Разрешница вчера доби и случајот со 66-годишната стружанка која почина од коронавирусот откако не беше хоспитализирана во Охридската болница. Министерот за денеска најави разрешување на директорката на болницата, а вчера, според најавите, на увид во болницата требаше да бидат испратени претставници од Државниот инспекторат за да утврдат евентуално други одговорни во случајот.
Предмет за случајот отвори и Јавното обвинителство.
„Според првичните информации, поради нагло влошената здравствена состојба кај сега починатата пациентка, матичниот лекар препорачал хоспитализација на Инфективното одделение во охридската болница. Но, пациентката и покрај упатувањето, не е примена во болницата“, стои во соопштението на Обвинителството.
Според информациите објавени на вчерашната прес-конференција во Владата, на Инфективната клиника во Скопје се хоспитализирани вкупно 49 пациенти од кои седум со потешка клиничка слика – пневмонија, воспаление на белите дробови, но нема пациенти кои се лекуваат на респираторна машина. Стабилна е состојбата и на сите други пациенти ширум државата.