Грција го поддржува евроатланскиот пат на целиот Балкан и сакаме да ја поддржиме и вашата земја. За НАТО постојат одлуки од Букурешт кои треба да се исполнат и тогаш оваа „мила соседна земја“ ќе биде и во ЕУ и во НАТО, порача денеска во Скопје, министерот за надворешни работи на Грција, Никос Коѕиас, по средбата со својот македонски колега Никола Димитров.

– Што се однесува до НАТО постојат забелешки од Букурешт и со нивното реализирање, оваа земја ќе стане член на НАТО. Како сега ќе се реализираат тие одлуки на НАТО не зависи од нас, туку зависи од тие што треба да одлучат. Ние ја сакаме оваа мила наша северна земја и во НАТО и во ЕУ, но ќе треба сето тоа да се оствари врз основа на правилата на ЕУ и НАТО. Државата кај што се наоѓам денес има и европско лидерство, и европска Влада и европска перспектива, но елемент на европската перспектива е да се почитуваат одлуките и правилата…Грција поддржува и продолжува да ја поддржува со сите нејзини сили стабилноста, суверенитетот на оваа пријателска северна земја. Оваа ваша стабилност ја храни нашата стабилност, а нашиот развој ги храни и вашиот развој и стабилност, истакна Kоѕијас.

Грчкиот шеф на дипломатијата додаде дека Грција се залага за стабилност и суверенитет на двете змеји, за неменување на граници и на едната и на другата земја но, како што рече и за развојот на сите земји од Западен Балкан.

Тој верува дека влегувањето на Западниот Балкан и посебно на Македонија во НАТО ќе биде добро за развојот на целиот регион.

На прес конференцијата Коѕиас неколкупати напомена дека најважен е развојот на како што тој ја викаше „вашата земја“, како и меѓусебната соработка.

– Се обидуваме да го поништиме иредентизмот и креативно да ги решиме проблемите. Јас откако станав министер, а можам за кажам и за Никола, ја ставивме раката на срце и рековме дека сакаме да ги решиме проблемите за нашите земји и народи. Ние сакаме да се решат сите проблеми и сакаме да ја поддржиме вашата земја да оди напред, рече тој меѓу другото.

Министерот Димитров соопшти дека двајцата разговарале за разликите околу името, но повеќе, како што појасни, за самиот процес за тоа како ќе се одвива, за методот и модалитетите, но и за што се интересите и грижите на двете страни по ова прашање.

На средбата, како што истакна Димитров, тој изразил надеж дека Грција ќе ја препознае новата реалност во Република Македонија и искрената желба за пријателство.

– Очекуваме и се надеваме на помош и поддршка во нашите европски интеграции и сакаме една со друга да гледаме пријател и иден сојузник и да не се надмудруваме, рече Димитров.

Прашан од грчките новинари да ги искоментира симболите во Македонија, именувањето на скопскиот аеродром, главниот автопат, статуите низ Скопје, Димитров рече дека историјата не е таа која треба да ја оформува иднината на државата.

– Единствена голема работа, не само како влада туку и како општество, кон која се стремиме е Голема Европа. Мислам дека не е многу мудро да креираме надворешна па и внатрешна политика базирана на историски личности од пред 2000 години. Свесни сме дека историјата не можеме да ја менуваме но она што можеме да го менуваме е сегашноста. Ние цврсто ќе стоиме на обврските од времената спогодба од 95-та година и секаде каде што можеме да реагираме ќе го направиме тоа. Како што ние не сме среќни кога нечии големи мапи навлегуваат на територија на Македонија, така разбираме дека и Грција не е среќна кога некој мавта со големи мапи. Мислам дека двата народи многу подобро ќе живеат ако има мостови и отворени врати. Не ми требаат 100 статуи за да бидам горд Македонец ниту пак ми пречи кога некој грчки граѓанин во Солун се нарекува Македонец. Во 21.век не треба да покажуваме комплекс за зацврстување на овие чувства, рече Димитров.