Министерот за надворешни работи, Никос Коѕијас пристигна во канцеларијата на грчкиот премиер Ципрас на разговори за напредокот во спорот за името. Како што објавија грчките медиуми, средбата била вонредно закажана.
Средбата, според грчките медиуми, е поврзана со телефонскиот разговор меѓу премиерите Ципрас и Заев и коментираат, повикувајќи се на свои извори и на информациите во македонските медиуми, дека овој разговор би можел да се случи во текот на денешниот ден.
Дел од грчките медиуми објавија и дека Заев во Германија ќе се сретне и со германската канцеларка Ангела Меркел за да и го „предаде предлогот за решавање на деценискиот спор околу името“.
Грчките медиуми го пренесуваат и ставот на владиниот портпарол Миле Бошњаковски дека „во Владата на РМ нема никакви поделба и разногласија и се работи посветено на решавање на спорорт, како и на јакнење на достоинството и идентитетот на граѓаните.
И министерот без ресор во Грција Алекос Флабурарис, оценил дека е отворена голема можност за решение на прашањето. Тој го повикал коалицискиот партнер во владата да не го спречи постигнувањето решение.
Како што објави МИА, грчкиот министер без ресор изразува убеденост дека набрзо ќе има договор меѓу Македонија и Грција, а вели дека актуелната грчка влада често носела и носи тешки одлуки, но тие биле за доброто на земјата.
– Договорот набрзо ќе се постигне со сложено име за внатрешна и надворешна употреба (erga omnes), со отстранување на иредентистичките претензии и промена на Уставот на соседната земја, објаснува Флабурарис за „Етнос“ и додава дека „мудрите и демократски граѓани во Грција поддржуваат решение“.
Засега останува неизвено кога би можел да се случи најавениот разговор Заев – Ципрас. Од Владата велат дека доколку дојде до него, јавноста веднаш ќе биде информирана.