Барбадос, островска држава во Карипското Море, од денеска и официјално е република, што значи дека британската кралица Елизабета Втора ја загуби титулата шеф на таа држава.
На церемонијата на менување на државното уредување, на која присуствуваше и принцот Чарлс, беше симнато знамето на британската монархија, додека генералната гувернерка Сандра Мејсон положи заклетва како прва претседателка на Барбадос.
Барбадос во средината на септември во 2020 година ја објави намера да стане република до 30 ноември во 2021 година, на денот на одбележување на 55 години од независноста. Островот со 287.000 жители е под британска власт од 17 век. Познат е по прекрасните плажи и рум и како родно место на пејачката Ријана. Премиерката Миа Мотли за време на церемонијата ја прогласи Ријана за нацонален херој. Барбадос останува република во рамки на Комонвелтот, група од 54 држави.