– Оваа влада ќе работи за сите граѓани на Израел, оние кои гласаа за неа, но и оние кои не го сторија тоа. Ќе сториме сè за да го обединиме израелското општество, напиша Лапид.
Парламентот треба да го одобри договорот меѓу двајцата опозициски лидери, што се очекува следната недела. Доколку договорот биде одобрен, Лапид и Бенет официјално ќе стават крај на 12-годишното владеење на Бенјамин Нетанјаху, најдолго во историјата на земјата.
Израелските медиуми пренесуваат дека сегашниот премиер, од очај, ќе стори се што е можно за да се спречи формирање на новата влада.
Лапид е роден на 5 ноември во 1963 година во Тел Авив. Пред да влезе во политика во 2012 година со основањето на партијата „Има иднина“, тој се занимаваше со пишано и телевизиско новинарство, а исто така имаше и улога во израелскиот филм „Песната на сирената“. Покрај тоа, објави седум книги и го напиша сценариото за драмската серија „Воена соба“, што беше емитувано во Израел во 2004 година.
Бенет и Нетанјаху добро се познаваат. Тие се во контакт од 2006 година, кога Бенет беше соработник на тогашниот лидер на опозицијата, а подоцна беше дел од владата на Нетанјаху како министер за одбрана, потоа за образование и економија.