Реал Мадрид е нов кошаркарски шампион на стариот континент. „Кралевите“ во евролигашкиот меч за титулата за оваа сезона триумфираа над Фенербахче со 85:80 (по четвртини: 21:17, 17:23, 25:15, 22:25) и по јубилеен десетти пат се искачија на победничкиот подиум.
„Направивме одлична работа вечерва и во петокот. Ова е неверојатна сезона за нас. Имавме многу проблеми, во декември бевме во ситуација да играме натпревар со седум играчи. Но, успеавме да пребродиме се. Имавме наш план и останавме фокусирани на него. Реал Мадрид е Реал Мадрид. Горд сум на моите играчи, горд сум на кошаркарите кои се европски прваци“, вели Пабло Ласо, тренерот на Реал Мадрид, Пабло Ласо.
Фабиен Козер беше најефикасен во белградска „Штарк арена“ со 17 поени, Лука Дончич го заврши финалето со 15 коша и четири асистенции и го понесе признанието за МВП на Фајналфор викендот додека Треј Томпкинс уфрли 10.
„Играме како тим и кога победуваме и кога губиме. Имав верба во своите соиграчи, но и во фановите кога беше тешко. И тие веруваа во нас иако некои други беа подготвени да нè отпишат. Немам зборови. Неверојатно е чувството да се биде шампион на Европа по вторпат во една иста сезона. Беше тешко да се стигне до овде, одигравме одлично во одбрана, имавме срце и глава и мислам дека ја заслуживме титулата“, истакна Дончич, потенцијалниот прв пик на драфтот во НБА лигата.
Жељко Обрадовиќ не успеа до титула на домашен терен со тимот на Фенербахче. Трофејниот српски кошаркарски стручњак го призна поразот, му честита на Реал Мадрид пришто истакна дека нијанси го решија победникот во финалето.
„Мечот беше прилично израмнет. Тие успеаја да го прекршат натпреварот во второто полувреме. Клучот беше во нашата одбрана што не беше на ниво на кое требаше да биде и на кое беше во изминатиот период. Но, мора да кажам дека промашивме и некои неверојатни зицери. Бевме целосно деконцентрирани и примивме поени што се нетипични за дефанзивата што вообичаено ја играме“, нагласи Обрадовиќ.
Бронзениот медал на завршниот турнир во Евролигата го однесоа кошаркарите на Жалгирис кои во „малото“ финале ја совладаа ЦСКА Москва со 79:77 (по четвртини: 22:19, 19:16, 28:13, 10:29).
Домаќин на наредното издание на Фајналфорот ќе биде Басконија.