Американскиот амбасадор во Србија, Кристофер Хил, денеска им изрази сочувство на семејствата на загинатите за време на војните во 1990-тите, вклучително и бомбардирањето на НАТО. Тој рече дека е свесен оти српскиот народ тоа никогаш нема да го заборави, ниту треба да го заборави.
„Животот го посветив на дипломатијата – изнаоѓање дипломатски решенија за навидум нерешливите проблеми. Во текот на мојата кариера научив дека дипломатијата понекогаш не успева. Кога тоа ќе се случи, резултатите може да бидат трагични. Им изразувам лично сочувство на семејствата на оние кои ги загубија животите за време на војните во 1990-тите, вклучително и како резултат на воздушната кампања на НАТО“, напиша Хил на Твитер.
Тој додаде дека Србите никогаш нема да ја остават својата тага настрана, но верува дека се доволно силни за тоа.
„Посветеноста на САД на нашето партнерство со Србија е непоколеблива, како и нашата посветеност на дипломатијата. Заедно можеме да изградиме подобра иднина каква што заслужува и сака српскиот народ за идните генерации“, заклучи американскиот амбасадор.