Некои градови во Украина имаат храна најмногу за уште за три или четири дена, соопшти хуманитарната агенција Mercy Corps, предупредувајќи дека хуманитарниот систем во земјата „целосно е расипан“.
„Една од нашите најголеми грижи во моментов е нестабилноста на синџирот на снабдување. Знаеме дека повеќето општини во областите каде што има најинтензивни борби имаат храна и неопходни работи само за уште 3-4 дена“, рече советникот за хуманитарен одговор на Mercy Corps во Украина, Стив Гордон, кој се наоѓа во Харков, местото на некои од најтешките борби од руската инвазија.
Најмалку 70 отсто од населението на Харков и Суми е целосно зависно од помош, процени тој.
„Ова се области како Суми, со 800.000 луѓе речиси целосно зависни во моментов од помошта што се испраќа на секојдневна основа. На градовите им е потребна храна за најмалку еден месец, складирана во различни магацини во случај да бидат нападнати“, рече Гордон.
„Реалноста е дека во моментов хуманитарниот систем е целосно урнат. Не гледаме високофункционални, координирани меѓународни напори за помош што ја покриваат цела Украина како што често гледавме во другите конфликтни зони“, рече тој. „Додека Обединетите нации добиваат помош во некои области, преку неуспехот на хуманитарните коридори видовме дека многу луѓе преживуваат само преку поддршка од малите украински граѓански организации, како црковните групи, кои ги координираат основните испораки како храна и лекови“, рече тој.