Наполи е во резултатска криза што ги затегна и внатрешните односи во клубот чиј член од летото е македонскиот фудбалски репрезентативец, Елиф Елмас. Управата почна да „удира по џеб“ како разврска за случајот „карантин“ што почна по ремито (1:1) против Салцбург во Лигата на шампиони. Незадоволен од исходот со австрискиот претставник на „Сан Паоло“, претседателот Еурелио де Лаурентис реши да организира еднонеделна изолација на фудбалерите од кои добар дел се оглушија на наредбата, а некои се спротивставија и на неговиот син, инаку потпретседател на клубот, поради што ќе следуваат и финансиски казни.
„Газета дело Спорт“ наведува и за какви казни станува збор и нагласи дека најлошо би можел да мине Бразилецот Алан со дури 200.000 евра. Сумата, се наведува, е во спротивност со еден член од колективниот договор на играчите според кој поединец не може да биде казнет со повеќе од 25 отсто од месечната бруто плата. Во случајот со Алан, тоа е 50 отсто од неговата месечна заработувачка.
Бразилецот најсериозно се судрил со Едо де Лаурентис, син на Еуроелио де Лаурентис и потпретседател на клубот, па затоа и ќе биде најтешко казнет. „Кориере дело Спорт“ истакнува дека вкупната сума на казни за фудбалерите ќе достигне 2,5 милиони евра. Поединечните суми, потенцира весникот, ќе варираат од 22.000 евра до 200.000 евра за што, најверојатно, ќе следува одбрана на играчкиот кадар и поднесување жалба по таквата одлука.
Наполи веќе шест меча не знае за победа. Моментно е на седмото место во Серија А со 20 бода, дури 15 помалку од лидерот и шампион Јувентус. Популарните „партенопеи“ викендот ремизираа со Милан (1:1), а задутре ги очекува гостување кај Ливерпул во претпоследното коло од групната фаза во Лигата на шампиони.