Кубанскиот претседател Мигел Дијаз Канел го именува министерот за туризам, Мануел Мареро Круз за прв премиер на Куба по 43 години, избор што го потврди и Парламентот во Хавана.

Мареро (56) беше министер за туризам цели 16 години, период во кој Куба доживеа наплив на туристи и хотелски комплекси, со што туризмот стана еден од најважните сектори на кубанската економија. Претседателот Дијаз Канел рече дека искуството на Мареро во преговори со странски инвеститори е една од неговите главни квалификации.

Позицијата премиер на Куба ја имаше Фидел Кастро од 1959 година до 1976 година кога новиот устав ја смени неговата титула во претседателска и ја укина функцијата премиер. Актуелниот устав ги подели овластувањата на претседателот и премиерот, кој е задолжен за дневни активности во петгодишен мандат.