Климатската промена е факт и закана не само за нашата генерација, туку и за многу следни генерации, па и за самата планета Земја. Немаме избор мораме да дејствуваме денес, иако може да се чини тешко. Мораме драстично да го намалиме загадувањето што бара тешки и болни избори. Потребен ни е нов одржлив економски модел што ги носи нашите земји кон еколошки и економски прогрес и ја унапредува благосостојбата на нашите граѓани, порача премиерот на Косово, Албин Курти во обраќањето на денешниот Социо-еколошки форум, прв настан од ваков тип на Западниот Балкан, што денеска се одржува во Скопје.
Новиот одржлив модел ќе ги почитува еколошките ограничувања на нашата планета. Европскиот гринвил се обидува да го стави акцентот на одржлив развој и просперитет. Ваквиот премин во Европа може да биде ефективен, само ако преземеме акција и во нашиот регион. ЕУ веќе ја претстави зелената агенда за регионот, што го предвидува европскиот зелен договор, рече Курти.
Нагласи дека зелената агенда подразбира да направиме темелни промени во нашата економија и во начинот на кој живееме. Циркуларната економија, според него, е едно од основните градбени единици на агендата за Западниот Балкан и е единственото што може да не одведе кон одржлив развој и да создаде нови работни места.
Во мојата влада презедовме акција за организација на ваков циркуларен економски модел, да го зачуваме нашиот диверзитет, да изградиме одржлив прехранбен систем и да се справиме со нашите темелни проблеми во земјоделството. Овој модел, исто така, ќе го промени односот кон ѓубрето и ќе создаде нови работни места во областа. Меѓуградскиот превоз, заедно со неколку други придружни фактори, останува и води кон загадување на нашата средина. Ова негативно се одразува врз здравјето на граѓанит, истакна премиерот на Косово.
Потенцира дека затоа не е прашање дали ни е потребна ваква транзиција, туку кога и како. Курти оцени дека потребна ни е силна социјална база и цврст еколошки кров под кој ќе живееме.
Косово ја обезбедува својата струја, првенствено од јаглен, со ограничени извори на ветер и хидроенергија. Мора да направиме двојна транзиција. Оваа недела направивме и завршивме шест месеци во Владата и поради тоа сè уште спроведуваме физибилити студија за тоа како да одиме напред на најдобар начин за нас и за регионот, потенцираше Курти.
Рече дека целосно се посветени на трансфер кон чиста енергија и кон инвестирање во обновливи извори како сончева и ветерна енергија, преку ремоделирање на домовите. Но понекогаш, истакна Курти, потребна ни е финансиска поддршка за овој процес да не го попречи економскиот развој што ги изведува нашите граѓани од сиромаштија.