Австрискиот канцелар Себастијан Курц по средбата со премиерот Заев ги повика граѓаните да излезат на рефeрендумот и да го подржат Договорот со Грција, а со тоа и евроатлантската перспектива на земјата.
„За Македонија решавањето на спорот за името претставува голема шанса, но и за целиот регион. Би сакал граѓаните на Македонија да ги поканам да учествуваат на овој референдум и да се изјаснат „За“ решавање на спорот за името и за европската перспектива. Секако тоа е одлука на секој поединец и не е мое да одлучувам за друг, но како пријател на Македонија кој доаѓа од земја членка на ЕУ сметаме дека ке биде позитивно ако има голем одзив и позитивен исход на референдумот“ кажа Курц.
Австрија е најважниот инвеститор во Македонија но и пријател на Македонија и освен тесна економска соработка не поврзува и човечко пријателство, а сакаме да живееме и во заедничка иднина, додаде Курц.
На прашањето која порака ќе ја испрати на средбата со претседателот на ВМРО ДПМНЕ Мицкоски, со која се сестрински партии во ЕПП, Курц рече дека пораката е иста и за опозицијата – решението за спорот е дел од патот за европска перспектива.
Премиерот Заев верува дека граѓаните на референдумот ке го дадат својот глас за Договорот со Грција со што се гарантира местото на Македонија во ЕУ и во НАТО.
„Посетата на Курц е потврда дека Македонија се врати на вистинскиот пат – европскиот пат. Светот ни порача дека не чекаат во ЕУ и НАТО – и пристигнаа датумот за преговори со ЕУ и поканата за НАТО. Сигурен сум дека зад одлуката на ЕУ да добиеме датум за преговори стои фокусот на австриското претседателство со Европската унија која јасно се определи да ги реализира европските перспективи на Западен Балкан“ кажа Заев.
Заев очекува двете земји ќе си го завршат својот дел од работата и Договорот ќе биде ратификуван и во грчкиот Парламент.