СДСМ денеска објави нов скандал поврзан со тендерските мрежи на ДПМНЕ.
Една иста фирма, во општините кои ги водат градоначалниците на ДПМНЕ но и во институциите добиваат милионски суми од тендерите и најчесто се јавуваат како единствени понудувачи, рече на прес конференција потпаролката Богданка Кузеска.
Станува збор за фирмата Мастеф ДООЕЛ Скопје, која како што вели Кузеска, преку неколку општини и институции во последните 3 години има добиено тендери вредни над 4 милиони евра.
Дополнително, за оваа иста фирма, од унгарскиот кредит, има одлука за избор за проценета вредност од 25.256.509 денари или околу 400.000 евра. Фирмата е омилена на градоначалниците на ДПМНЕ, Кисела Вода, Аеродром, Неготино, рече на прес конференцијата Кузеска.
Таа ги наведе тендерите и следните општини:
Во општина Кисела Вода каде градоначалник е Орце Ѓорѓиевски од ДПМНЕ, за период од 2022 година до 2024 година, оваа фирма има добиено тендери во вредност од 1,7 милиони евра.
Од општина Аеродром, и во време кога градоначалник бил Тимчо Муцунски оваа иста фирма има земено тендери, односно склучени договори тешки речиси 1 милион евра.
Во општина Неготино, каде градоначалник е Стојанов од ДПМНЕ од 400.000 илјади евра.
Од вкупно 13 тендери во овие општини на дури 11 фирмата се јавува како единствен понудувач.
Оваа иста фирма добила тендери и во Министерството за спорт и министерот Борко Ристовски, со Договор од 65,5 милиони денари или околу 1 милион евра.
Најголем дел од договорите се со иста вредност како проценетата вредност.
Ова е првиот сомнеж, дали можеби сумата била однапред договорена?
Богданка Кузеска рече дека за овој голем скандал бараат институционална реакција, Јавното обвинителство и ДКСК веднаш да постапат.