СДСМ преку Владата и институциите што ги предводи, останува посветена на надминување на последиците од енергетската криза и заштита на економскиот стандард на граѓаните. Активирани се сите капацитети за производство на електрична енергија, за да се спречи увозот на скапа струја, вели Богданка Кузеска, портпарол на СДСМ.
– Во буџетот за 2022 година веќе има предвидени 130 милиони евра кои ќе бидат наменети за антикризни мерки за помош на граѓаните и на стопанството. Овој износ дополнително ќе се зголемува доколку се јави таква потреба. Во овој период се креираат конкретни мерки за помош кои ќе се реализираат во текот на годината а кои ќе имаат за цел директна помош на семејствата, но и на компаниите. Македонската економија е стабилна, подготвена да се соочи со предизвиците што со себе ги носи енергетската криза, но и пандемијата со коронавирусот, рече Кузеска.
Според СДСМ со преземање на навремени, ефикасни економски политики, за годинава очекуван е раст на економијата од најмалку 4,6 отсто.
– Новата Владата предводена од СДСМ ќе остане фокусирана на сериозно зголемување на домашните приватни инвестиции и влез на нови странски директни инвестиции. Сето тоа ќе влијае на дополнителен пад на невработеноста која сега изнесува 15.9 отсто, како и на забрзување на економскиот раст. Платите ќе продолжат да растат и во текот на оваа година. Следува ново зголемување на минималната плата, што со себе ќе донесе раст и на просечната плата која наскоро ќе ја надмине границата од 30.000 денари, односно 500 евра. Подобар економски стандард и повеќе пари кај граѓаните, но и конкретна помош за домашната економија се приоритетите на новата Влада предводена од СДСМ. Посветено, ефикасно и одговорно продолжуваме да работиме во интерес на граѓаните и државата, вели Кузеска.
