Во Основниот суд Скопје 1 денеска продолжи сведочењето на дел од пратениците на СДСМ на судењето за настаните од 27 април.
Пратеничката Катерина Кузмановска сведочеше дека дента кога толпата влегла внатре во Собранието, експресно брзо се качила во прес центарот и покрај вербалните закани мавала со се што ќе и дојде при рака.
-Колегите пратеници не предупредија дека се можни инциденти. Ми беше чудно како толпата толку брзо се качи горе. Имаше двајца со црни маички и фантомки кои очигледно беше дека ја насочуваа толпата. Викаа, навредуваа, маваа со се што ќе им дојде при рака. И тогаш го видов раскрвавеното лице на Зоран Заев и крвави кошули. Видов како го тепаа Павле Богоевски. Двајца од насилниците видов како нападнаа двајца новинари кои снимаа со камера. Видов како ја кубат Радмила Шеќеринска. Слушав како викаа, фатете го шарениот, убијте го (Павле Богоевски) и фатете ја и полицајката (Фросина Ременски). Една повозрасна госпоѓа ме покри со телото и велеше оставете ја жената не и е добро. После слушнав како некој ме прашува дали ми е добро. Го препознав еден од собраниското обезбедување кој направи обрач и ми рече ќе ме засолни, сведочеше Кузмановска.
Опишувајќи по хронолошки ред што се случувало, Кузмановска кажа како заедно со собранискиот лекар се обидувале да им помогнат на сите повредени што доаѓале во собраниската амбуланта.
-По извесно време дојде Никола Тодоров и рече дека ќе се обиде да ја извади Радмила Шеќеринска, а по 15 минути ќе може да извади и друг. Потоа не качија во канцеларијата на пратеникот Ѓорчев. Го видов Тарчулчовски како разговара со двајца специјалци. Дојдоа и колеги пратеници од ВМРО. И само се гледавме. Само двајца, тројца не прашаа како сме. Мислев дека никогаш нема да излезам жива. Ако не беше тој гнев и говор на омраза претходно, ако не беа отворени вратите од Собранието и ако меѓу нас градевме поинакви односи тогаш мислам дека никогаш немаше да се случи 27 април, кажа Кузмановска.
Денеска претходно сведочеа пратеникот Енес Ибрахим и сега заменик министер за образование Петар Атанасов.