Домашниот терен како предност на хартија и, особено, тешко подносливите температури како реален адут ќе бидат на страна на Шкендија против Хелсинки во воведните 90 минути од второто коло квалификации за Лига Европа. Дуелот е закажан за попладнево (18 ч.) на стадионот „Младост“ во Струмица, реваншот е наредниот четврток во Финска.
Тетовци со оптимизам влегуваат во пресметките со ривалот од северот на континентот по двете убедливи победи со Дачија (3:0, 4:0) во првото коло. Но, воедно се претпазливи бидејќи се свесни дека Хелински е над нивото на Молдавците, а повисокиот квалитет бара и посериозен пристап во што тренерот Ќатип Османи не се сомнева.
„Дачија беше едно, Хелсинки е сосема нешто друго. Имавме доволно време за анализа на добрите и слаби страни на нашиот нареден ривал во Лига Европа. Постои задоволство од начинот на кои ги одигравме претходните два меча и, секако, од резултатите. Ситуацијата сега налага поинакков, посериозен пристап. Фудбалерите го знаат тоа. Нашата амбиција е јасна. Сакаме во трето коло. Затоа мора соодветно и максимално да одговориме на предизвикот, не само овде во Струмица туку и во реваншот“, нагласи тренерот на тетовските „црвено-црни“.
Фразата „тимот што победува, не се менува“ е често повторувана во спортски прилики. До неа ќе се држи и предводникот на македонскиот вицепрвак. И нема причина за корекции во линиите што функционираа добро во изминатите 14 дена освен ако, се разбира, Османи се најде во безизлезна позиција и биде принуден на такво нешто.
„Никој од нас не помислуваше дека ќе биде така лесно против Дачија. Овојпат тоа нема да биде случај. Пред нас се два исклучително тешки натпревара во кои не смее да има опуштање. Подготвени сме за максимално вложување и веруваме дека можеме до победа за колку-толку олеснување на задачата во реваншот. Целта ни е елиминација на Хелсинки“, истакна капитенот Ферхан Хасани во пресрет на денешното соочување со Хелсинки, 137 клуб во рангирањето на УЕФА.
Делењето на правда во денешниот дуел на Шкендија и Хелсинки е доверена на Австриецот Маркус Хаметер и сонародниците Кристијан Риглер и Роланд Ридел.