Лина Ѓорческа ќе игра против 17 годишната Австралијка Дестани Габриела Ајава во првото квалификациско коло за Ју-Ес опен. За најдобрата македонска тенисерка ова ќе биде второ учество на последниот гренслем во сезоната. На Флешинг Медоу дебитира лани кога беше поразена на стартот од Катрин Белис од САД со 0:6, 2:6.
Најдобрите резултати на гренслем турнир Ѓорческа ги имаше на Австралија опен. На патот до главната ждрепка ги совлада Американката Сачија Викери (6:2, 3:6, 6:3) и Унгарката Далма Галфи (6:1, 6:1) пред да загуби од Стефани Фогел од Швајцарија (6:4, 3:6, 2:6) во квалификациското финале.
Елиминации во првото коло доживеа на Ролан Гарос и на Вимблдон. Во Париз, 23 годишната тетовка беше поразена од Кирине Лемон со 6:3, 3:6, 3:6, а подобра од неа во Лондон беше Александра Круниќ од Србија со 6:4, 6:4.
Ајава, пак, по првпат ќе учествува на тенискиот гренслем во Њујорк. На Ролан Гарос го заврши настапот на стартот од квалификациите, на Вимблдон стигна до третото квалификациско коло, а на Австралија опен заигра на главниот турнир и во првото коло беше елиминирана од Германката Мона Бартел.
Мечот меѓу Ѓорческа и Ајава е закажан за попладнево од 17 часот.