Сениорски репрезентативни првенци за Висар Муслиу и Енис Барди, копија гол од Торино на Александар Трајковски и враќање во националниот тим на Аријан Адеми со погодок. Четворицата фудбалери го потпишаа убедливиот триумф на Македонија против Лихтенштајн (4:0) во последниот настап во квалификациите за Светското првенство во Русија наредното лето.
Серијата голови на стадионот „Младост“ во Струмица ја отвори вардаровиот стопер Муслиу во 36. минута по корнерот на Езџан Алиоски. Две минути подоцна, во реплика на израмнувачкиот погодок против Италија, играчот на Палермо зголеми на 2:0 пришто Пандев одново беше во улога на асистент како и на „Олимпико“ во петокот.
Во две минути во второто полувреме паднаа и другите два гола. Членот на Леванте, Барди во 66. минута реализира по додавање од Трајковски, а само што влез во игра Адеми го комплетира покерот голови на струмичкиот тревник.
Македонија ги заврши квалификациите како петтопласирана во групата Г со 11 бода (три победи, два нерешени исхода и пет порази). Директен пласман на мундијалот осигура Шпанија чии фудбалери вечерва го совладаа Израел со 1:0. Со идентичен резултат и Италија, која ќе игра бараж, славеше против Албанија во Скадар. Албанците го освоија третото место со 13 бода, еден повеќе од Израелците, Лихтенштајн се оправда како аутсајдер во конкуренцијата и финишира во циклусот без ниту еден бод.
Македонија – Лихтенштајн 4:0 (2:0)
Стадион: „Младост“ во Струмица. Гледачи: 2,500. Гл. судија: Лоран Коприва. Асистенти: Даниел да Коста и Давид Матеус Сантос (сите тројца од Луксембург). Ж. картони: Зајков (Македонија); Кауфман, Висер, Селе, Стрелци: Муслиу 36′, Трајковски 38′, Барди 66′, Адеми 68′ за Македонија.
Македонија (формација: 4-2-3-1): Димитриевски – Ристевски, Зајков, Муслиу, Ристовски – Барди (Дориев 76′), Хасани (Елмас 46′) – Трајковски, Алиоски, Пандев (Адеми 66′) – Несторовски. Селектор: Игор Ангеловски.
Лихтенштајн (формација: 4-1-4-1): Јеле – Гепел, Кауфман, Малин, Квинтанс – Полверино – Брендл (Ерне 72′), Висер, Бухел (М. Селе 79′), Волфингер (Јилдиз 65′) – А. Селе. Селектор: Рене Паурич.
Квалификации за СП 2018
Група Д
Србија – Грузија 1:0
Велс – Република Ирска 0:1
Молдавија – Австрија 0:1
Табела: Србија 21, Република Ирска 19, Велс 17, Австрија 15, Грузија 5, Молдавија 2.
Група Г
Македонија – Лихтенштајн 4:0
Израел – Шпанија 0:1
Албанија – Италија 0:1
Табела: Шпанија 28, Италија 23, Албанија 13, Израел 12, Македонија 11, Лихтенштајн 0.
Група И
Украина – Хрватска 0:2
Исланд – Косово 2:0
Финска – Турција 2:2
Табела: Исланд 22, Хрватска 20, Украина 17, Турција 15, Финска 9, Косово 1.