По барање на адвокатката на новинарот и уредник Драган Павловиќ – Латас, судот не дозволи снимателите во судницата да направат инсерти од денешното рочиште за случајот Тотал на СЈО, каде тој се товари за даночно затајување.
Судијката Софче Гаврилова Ефремова одлучи да им го одобри барањето, со што беше дозволено снимање само на обвинителите на Специјалното јавно обвинителство.
Исто така, Латас побара визуелно и аудио снимање на судскиот процес за случајот „Тотал“.
Тој, за адвокат на фирмите ја назначил неговата адвокатка Анита Бегова која рече дека сите биле спремни за судењето да почне уште од вторникот на минатото рочиште, но прво бараат судот да обезбеди услови за снимање на целиот судски процес.
Судијката Гаврилова-Ефремова укажа дека капацитетот и можностите на судницата се тие, дека таа суди во мала судница и дека единствено големата судница со број еден во Кривичниот суд е таа која може да обезбеди услови сите да може да седат и целиот судски процес да се снима. Рече дека со оглед дека во големата судница веќе се закажани судски рочишта за обвиненијата на СЈО, судијката во 11 часот, откако ќе направи проверка за слободен термин, ќе го соопшти датумот за кога ќе биде закажан случајот „Тотал“.
Според обвинението на Специјалното јавно обвинителство Драган Павловиќ во период од осум години давал лажни податоци во книговодствената евиденција на фирмите со цел да одбегне плаќање на данок.
Тој е обвинет дека со лажирање на книговодствената евиденција на фирмите Тотал Маркетинг Агенција, Тотал Маркетинг, Медиамакс и Тотал Медиа Центар ДООЕЛ Скопје избегнал да плати данок на државата во износ од 164 илјади евра.
Се работи за даночно затајување во периодот од 2008 до 2015 година. Латас како управител на овие фирми, ја намалил основицата за пресметување данок на добивка, го злоупотребил правото на одбивка на ДДВ и не пријавил лични приходи, кои задолжително се пријавуваат согласно Законот за персонален данок од доход.