Published: Sunday, May 20, 2018 23:49
Ѓорѓи Лазаревски и Звонко Костовски, вработените во УБК кои го открија скандалот со прислушувањето во Македонија, се номинирани како укажувачи за наградата која ја доделува Европскиот парламент.
Мотото на годинашната награда е „Новинари, укажувачи и чувари на правото на информирање”.
Ѓорѓи Лазаревски и Звонко Костовски се номинирани за „нивното откритие дека се прислушувани над 20.000 политички противници од страна на Владата предводена од Никола Груевски што доведе и до оставка на Владата.
Годинашната награда е во чест на Дафне Каруана Галиција, новинарка од Малта, која беше убиена со бомба поставена во нејзиниот автомобил.
Покрај македонските „свиркачи“ номинирани се и Јан Куцијак, словачкиот истражувачки новинар, кој беше убиен, основачот на Викиликс Џулијан Асанж, Мариа Ефимова, укажувач која откри корупција поврзана со политичарите во Малта и Рафаел Халет укажувачот за даночна евазија во Луксембург, поврзан со „Луксембург Ликс“.
Европскиот Парламент на 29 мај ќе ги прогласи победниците и ќе ја додели награда која изнесува 5000 евра. Наградата е посветена на поединци или групи кои биле заплашувани или прогонувани за откривање на вистината и нејзино објавување во јавноста.
Ѓорѓи Лазаревски и Звонко Костовски, во март годинава ја добија годишната „Наградата за слобода на говорот“ на Коалицијата за заштита на свиркачите во Југоисточна Европа и Европскиот центар за заштита на правата на свиркачите.