Либерално-демократската партија, огласувајќи се преку својот потпретседател Зоран Шапуриќ денеска реагираше на загадениот воздух, потенцирајќи дека истиот е една од најголемите закани по здравјето на граѓаните.
– Состојбата е сериозна и бара утврдување и преземање на низа неодложни и итни мерки и активности, но и среднорочни и долгорочни мерки и активности. Власта предводена од ВМРО ДПМНЕ не презема ништо и наместо конкретно делување, реагира со некакви “препораки“. Наместо инвестиции, кои ќе придонесат за намалување на загадување на воздухот и натаму се продолжува со инвестици кои се непродуктивни, како што се панорамското тркало, т.н барокни фасади, жални врби и низа други скапи проекти, подвлече Шапуриќ, кој дополни дека справувањето со воздухот бара мултисекторски и мултидимензионален пристап со вклучување на голем број институции на централно и на локално ниво.
ЛДП вели, откако опозицијата ќе ја преземе власта по изборите на 11.декември ќе придонесе за државни инвестиции во производство на енергија од обновливи извори, особено на ветровата и сончевата енергија и субвенции за приватни инвестиции во оваа сфера а и итно ќе воспостави забрана на увоз на стари возила кои се под ЕУРО 5 стандард.
Шапуриќ додаде и дека ќе сттимулираат користење на електрични возила, хибридни возила и возила на природен гас и ослободување од ДДВ и од царински давачки, како и изградба на соодветна инфраструктура која ќе ги опслужува овие возила.
ЛДП се залага, како што вели тој и за изградба на подземни сообраќајници во големите градови, потоа итно прекинување на масовна неодржива, анти еколошка и нехумана градба и масовно и безмилосно уништување на зеленилото и подигање на нови зелени површини, како и за строга контрола на градежните работи и на севкупната механизација која се користи при градбата и миењето на околината околу градежните објекти.
Во период на енормно загадување, тој вели новата власт ќе дозволи бесплатен јавен превоз во големите градови, а ќе инвестираат и во современи уреди за пречистување на воздухот.
– Овие мерки ќе се поттикнуваат преку основање на целосно независен еколошки фонд, во кој ќе се слеваат средства од еколошките такси – овој фонд е програмска опредлба на ЛДП уште од 2011, образложи Шапуриќ.