Со освоени 289 електорални гласови од вкупно 538, републиканецот Доналд Трамп е избран за 45 претседател на САД. Неговата противкандидатка демократката Хилари Клинтон освои 218 гласови од членовите на електоралниот колегиум.
Трамп во првото обраќање по победата рече дека ќе биде претседател на сите Американци и дека ќе го обнови американскиот сон.
А за време на својата кампања, Доналд Трамп добиваше поддршка од претежно десничарските европски лидери од типот на главните заговорници за Брегзит, Најџел Фараж и французинката Марин Ле Пен. Честитките не престануваат по неговата победа.
Петте клучни сегменти по кои светот може да се промени со Трамп
Основачот на францускиот Национален фронт, и татко на Марин, Жан-Мари Ле Пен преку Твитер порача „Да живее претседателот Трамп“ додавајќи дека тој всушност е претставник на светскиот популистички бран.
„Американскиот народ сака Доналд Трамп да биде нивниот претседател. Денес САД, утре Франција, браво“, напиша Ле Пен.
Премиерот на Унгарија, Виктор Орбан смета дека победата на Трамп се прекрасни вести, и тоа значело дека демократијата се уште била жива.
„Какви прекрасни вести. Демократијата е се уште жива“, напиша тој на Фејсбук.
Уште во јули, Орбан го соопшти своето мислење дека плановите на Трамп во однос на миграцијата и надворешната политика се од клучно значење за Унгарија.
Крајно десничарите од Холандија, Белгија, Русија, Чешка, Италија и Србија се вбројуваат помеѓу поддржувачите на Трамп, додека нео-нацистичката Златна Зора од Грција изготви и видео со поддршка за Трамп.