За еден кошаркар постојат два моменти кои го вивнуваат на пиедесталот: пензионирање на дресот во кој тој настапувал и да влез во Куќата на славните. На Коби Брајант му успеа не еден, туку два дреса да му пензионираат во Стејплс центарот, броевите 8 и 24, а Куќата на славните е само прашање на датум бидејќи неговото место таму е загарантирано.
Минатата ноќ, за време на натпреварот помеѓу Лос Анџелес Лејкерс и Голден Стејт Вориорс, на паузата од првото кон второто полувреме, Брајант беше почесетен со големи зборови од легендата на Лејкерс, Меџик Џонсон, кој рече дека Коби Брајант е најдобриот кошаркар кој го облекол дресот на Лејкерси.
Ова е уште поголемо признание ако се знае дека освен големиот Џонсон, тимот го претставувале и Карим Абдул Џабар, Вилт Чемберлен, Шекил О’Нил и ред други легендарни имиња на кошарката.
„Голема благодарност за ова што се случува вечерва. Ова не е само за мене, ова е за сите оние кои имаат дресови во оваа сала, кои ми беа инспирација да бидам се подобар“, изјави Коби, кој на трибините беше поздравен од Шекил О’Нил.
Воедно, Брајант пред присутните објасни зошто го променил бројот на дрес во текот на фантастичната кариера, откако во 2006 година бројот 8 го замени со 24.
„Кога првпат дојдов во лигата ја зедов осумката, сакав само да докажам дека заслужувам да сум овде, дека сум меѓу најдобрите. Кога го сторив тоа, бројот 24 е чекор напред. Физичките атрибути не беа толку доминантни, но зрелоста беше поголема, морав да ја сменам перспективата како еден од највозрасните во тимот, што треба да се грижат за помладите“, рече Брајант.
Меџик Џонсон и сопственикот Џери Бас му прочитаа писма во име на клубот чии дрес го носеше две децении, а во кој освои пет прстени во најсилната кошаркарска лига – НБА.