По најавите дека СЈО ќе побара од Валтер Голдениц, Михаел Франк, Андреа Шаги, Петер Жом, Карој Швејнингер, Андреас Маиерхофер, Сузане Крогман и Атила Кесег, неизвршни и независни членови во Одборот на директори, да дадат согласност обвинителите да извршат претрес во „Македонски Телеком“, денеска специјалната јавна обвинителка Ленче Ристовска со тимот влезе во компанијата.
Засега нема информации дали СЈО е на состаноци во компанијата, или е започнат увидот на документите.
СЈО минатата недела потврди дека се соочува со опструкции од претставниците на македонскиот државен капитал во компанијата и од судот кој измислува разни причини за да не даде налог за претрес.
По отворањето на истрагата за масовното прислушување наречена „Таргет“ на 18 ноември минатата година, СЈО се обидува да влезе во Телеком, но Основниот суд Скопје 1 четири пати одбива да му даде судски налог за влез во компанијата.
Според досега објавените информации, СЈО во моментов има докази за околу 5.000 нелегално прислушувани телефони, што ги обезбеди на 19 октомври лани, кога со судски налог влезе во УБК за да изврши претрес и контрола на системите за следење на комуникации.
Според информации на НОВА, СЈО не може да открие колку точно лица биле прислушувани токму поради тоа што Телеком не дава пристап до нивната документација.
Доказите со кои во овој момент располага СЈО упатуваат на основано сомнение дека преку системите за следење на комуникации во периодот 2008-2015 година незаконски била следена комуникацијата на најмалку 4286 телефонски броеви, за кои воопшто не биле издадени судски наредби за нивно следење, а уште 1541 телефони биле следени откако била завршена судската наредбата за прислушување. Притоа, незаконски биле следени и сите лица кои комуницирале со телефонските броеви кои биле таргет на незаконско прислушување во тој период. Се претпоставува дека се околу дваесетина илјади кои зборувале со прислушуваните, но точната бројка не се знае и токму затоа СЈО сака да влезе во Телеком.