Сите надлежни служби беа вклучени веднаш по падот на беспилотен авион од воен тип, кој според досега собраните податоци, навлегол во хрватскиот воздушен простор од исток кон запад или од унгарскиот воздушен простор со брзина од 700 км/ч на височина од 1.300 метри, објави предмалку Јутарњи лист.
Хрватскиот министер за одбрана, Марио Баножиќ денеска во 11 часот ќе има вонредна прес-конференција по падот на леталото, најверојатно, дрон, синоќа по 23 часот во Загреб. Во тек е криминалистичка истрага во соработка со криминалистичката и воената полиција.
Хрватските медиуми јавуваат дека утринава бил одржан итен состанок на надлежните тела од безбедносно-одбранбениот состав во Канцеларијата на Советот за национална безбедност поради падот на леталото кај студентскиот дом во Загреб, по којшто хрватската Влада испратила соопштение:
– Во Канцеларијата на Советот за национална безбедност се одржа состанок на надлежните органи на безбедносниот и одбранбениот систем на кој присуствуваа вицепремиерот и министер за хрватски бранители г. Медвед, вицепремиерот и министер за внатрешни работи, Божиновиќ, министерот за одбрана Баножиќ, директорот на Безбедносно-разузнавачката агенција г. Маркиќ, директорот на Воено-безбедносната разузнавачка агенција генерал-мајор Киндер и шефот на Канцеларијата на Советот за национална безбедност, Фрањиќ. Сите надлежни служби беа вклучени веднаш по падот на беспилотен авион од воен тип, кој според досега собраните податоци, навлегол во хрватскиот воздушен простор од исток кон запад или од унгарскиот воздушен простор со брзина од 700 км/ч на височина од 1300м, објави предмалку Јутарњи лист.
„Во тек е криминалистичка истрага во соработка со криминалистичката полиција и воената полиција, а во координација со безбедносниот и одбранбениот систем се преземаат и други мерки, вклучително и меѓународна соработка, особено со НАТО, за утврдување на сите околности“, се додава во соопштението од Владата.
Јутарњи лист објави и дека премиерот Андреј Пленковиќ, кој во Париз присуствува на неформалниот самит на Европскиот совет за Украина, ќе даде изјава за медиумите денеска околу 10.30 часот.