Published: Sunday, November 18, 2018 13:23
Фудбалската репрезентација на Германија ја тресе страшна резултатска криза. „Панцирите“ имаа лош вовед во 2018 година низ пријателските мечеви, нивното бледило кулминира на Светското првенство во Русија од кое беа елиминирани во групната фаза, а ништо, се чини, не е сменето и во периодот по него. Светскиот шампион од мундијалот во Бразил во 2014 година е елиминиран од борбата за титула и во Лига на нации, новоформирано натпреварување на УЕФА. Откако стана извесно дека ќе завршат како последни во групата со Холандија и со Франција, селекторот Јоаким Лев, сепак, повика на смиреност.
„Холандија ја победи Франција што е непријатен развој за нас бидејќи ги загубивме шанса да останеме во Лига А. Треба да се помириме. Вниманието, како и досега, е насочено кон Европското првенство во 2020 година. Сакаме да се претставиме силно. Ние продолжуваме да работиме со младите и постепено да ги интегрираме во тимот. Оваа година се покажа како разочарувачка, но сакаме да ја завршиме со победа“, изјави Лев.
Германците ја пречекуваат Холандија во последниот натпревар, но без оглед на исходот, тие ќе завршат на дното во групата, бидејќи не можат да ги надминат ниту „лалињата“, ниту светскиот шампион Франција. Мечот помеѓу Германија и Холандија ќе се одигра утревечер (20.45 ч.) на „Фелтинс Арена“ во Гелзенкирхен.