Специјалното јавно обвинителство потенцијално може да остане со уште еден обвинител помалку. Според неофицијални извори, обвинителката Лиле Стефанова минатиот месец конкурирала за позиција во Републичкото јавно обвинителство, објави Алсат М.
Лиле Стефанова дојде во СЈО со речиси две децении искуство во обвинителството и тоа од позиција во Обвинителството за организиран криминал и корупција. Најголемиот предмет кој го работи во Специјалното јавно обвинителство е „Титаник“, каде врвот на ВМРО-ДПМНЕ е обвинет за злосторничко здружување, злоупотреба на пари во изборната кампања и повреда на избирачкото право. Токму за овој случај Кривичниот и Апелацискиот суд донесоа одлуки за одземање на пасошите на екс премиерот Никола Груевски и други високи функционери на ВМРО-ДПМНЕ.
Стефанова беше обвинител и во случаите „Ликвидација“, во кој обвинет беше новинарот Томислав Кежаровски, „Претседавач“, во кој се гонеше претседателот на Советот на Општина Центар, Мирослав Шиповиќ, и „Фаланга“ во кој му се судеше на Паско Кузман, како и случајот „Маѓар телеком“.
Со евентуалното заминување на Стефанова, СЈО ќе остане со 10 обвинители вклучувајќи ја тука и Катица Јанева. Ова обвинителство ја почна работата со 13 обвинители, но на почетокот на 2016-тата од непознати причини оттаму си заминаа обвинителките Лејла Кадриу и Марија Ѓореска.