Лино Червар од денеска и официјално е старо-нов селектор на машката ракометна репрезентација на Хрватска со која во минатото освои шест медали на големите натпреварувања меѓу кои и злато на олимписките игри во Атина во 2004 година. Промоцијата во Загреб се случи на точно една недела по раскинот на соработката со Ракометната федерација на Македонија (РФМ).
„Си дојдов дома. Животот на тренер со куфер во раце е едно патување. Моето е навистина долго. Трае веќе 40 години од кои 20 минав во странство. Секогаш доаѓа момент кога човек ќе го посака својот дом и семејство. Дома е полесно бидејќи сте опкружени со оние кои ве сакаат“, рече Червар во обраќањето пред јавноста и преземање на тимот на чие чело беше од 2002 година до 2010 година.
Изминатите седум години ги мина во Македонија. Најголем дел од нив како тренер на Металург, а во последните неколку месеци и како селектор на „црвено-жолтите“.
„Сакам да ѝ се заблагодарам на Македонија. Таму бев седум години. Ме дочекаа со раширени раце и бев почитуван“, порача трофејниот ракометен стручњак.
Покрај олимписката титула од Атина, Червар ги водеше „коцкестите“ до злато на СП 2003 година и до сребро на СП 2005, на СП 2009, на ЕП 2008 и на ЕП 2010.
„Иако сум повозрасен за седум години, сепак, сè уште сум гладен за победи, за успеси. Максимално сум мотивиран и не сум сезнајко. Човек учи додека е жив. Не сакам да си го одземам правото на борба до крај. Та сакам да го пренесам на ракометарите“, додаде Червар чија цел ќе биде Европското првенство во Хрватска од 14 до 28 јануари догодина во Хрватска.