Published: Tuesday, July 14, 2020 18:12
На социјалните мрежи и на дел од порталите се појавија наводни резултати од гласањето на лицата во домашен карантин и самоизолација поради Ковид-19 што се спроведе на вчера (13 јули), како и од денешното гласање на болните, на изнемоштени лица, затворениците, лицата во домашен притвор и во старечките домови.
Се работи за лажна вест. Согласно Уредбата со законска сила за прашања поврзани со изборите за пратеници во Собранието на Република Северна Македонија на 15 јули 2020 година, гласањето на лицата во домашен карантин и самоизолација поради Ковид-19 се спроведува на ист начин како и гласањето на болните и немоќни лица. Тоа значи дека гласачот го превиткува гласачкото ливче и така превиткано го става во плик кој се залепува и се става во гласачката кутија.
На денот на изборите, пред започнување на гласањето, пликовите се отвораат и без да види за кого е гласано, гласачките ливчиња се пуштаат во гласачката кутија. По завршувањето на гласањето, овие ливчиња се измешани со гласачките ливчиња од денот на изборите и се бројат заедно. Оттаму, невозможно е некој да ги знае резултатите од гласањето на овие лица.