Полициски службеници за првпат на претстојните локалните избори ќе обезбедуваат доверлив материјал, меѓу којшто ќе бидат и апаратите за вчитување на отисоци од прсти на гласачите. Државната изборна комисија (ДИК) денеска на седница усвои Правилник за начинот на постапување на полицијата на изборите што е изготвен во соработка со МВР. На седницата е усвоено и упатство за гласање на болните и изнемоштени лица кои ќе гласаат како и досега со примена на УВ ламба и спреј и за кои нема да се користат терминалите за вчитување на отпечатоци од прсти.
Новина во Правилникот за овие избори е што се воведува задолжително полициско обезбедување при транспорт на избирачкиот материјал од ОИК до Избирачките одбори и обратно. Се работи, пред сè, за доверливиот материјал – гласачки ливчиња и Избирачки список, но и техничката опрема за идентификација на гласачите преку отпечаток од прст. Тоа значи дека целокупниот доверлив изборен материјал се регулира да биде задолжително обезбдуван, чуван и транспортиран од полицијата, објасни членот на ДИК, Борис Кондарко.
Исто така, како што кажа, во прилог на овој Правилник се донесува и образец за повикување на полициија што ќе се достави до избирачките одбори. ДИК на секои избори, па и на овие ќе соработува со Централниот изборен штаб на МВР за изборите.
Потпретседателката на ДИК, Дитмире Шеху соопшти дека на овие избори болните и немоќни лица нема да бидат проверувани со терминалите за отпечатоци од прсти, туку дека тие ќе гласаат како и досега со УВ ламба и спреј. ДИК усвои упатство за начинот на гласање на овие лица и условите што се потребни да ги исполнат за да можат да гласаат на ден пред изборите и во своите домови. Барањето и медицинските документи тие треба да ги достават до подрачните единици и канцеларии на ДИК преку полномошник или по електронски пат.
На локалните избори закажани за 17 октомври во земјата за првпат треба ќе се користат терминали за вчитување на отпечатоци од прсти. Првите 250 апарати се најавени да пристигнат утре во ДИК.