Собраниската комисија за надзор на Управата за безбедност и контраразузнавање (УБК) и на Агенцијата за разузнавање (АР) со месеци чека УБК да достави податоци за целата опрема која ја има на располагање и за онаа која е набавена и расходувана, вели претседателот на Комисијата Хари Локвенец за НОВА.
Токму поради ова, Локвенец тврди дека членовите на собраниската комисија не можат да извршат контрола во Управата, бидејќи пратениците немаат материјал за претходно да се подготват за посетата.
-Досега Комисија за надзор на службите нема направено контролна посета во УБК, бевме двапати но се запознавме само со организационата поставеност. Причината е што пратениците кои ја сочинуваат оваа Комисија не се експерти и од самиот почеток доставивме писмено барање да ги добиеме информациите за целата опрема која е на располагање на Управата која се користи за следење на комуникациите, моменталната, и онаа која е набавена и расходувана. Побаравме карактеристики, упатство за употреба од производителот. Тоа е минимум услови за да направиме суштинска контрола, вели Локвенец.
Според него собраниската комисија не смее да биде алиби за нечие работење, и да ја посетат Управата без никакви претходни информации, односно да се оди само на „кафе пиење“.
-Одбиваат одговор на прашањето за опремата, техничките карактеристики, како би знаеле со што би се соочиле при нашата посета и да извршиме вистинска, суштинска контрола. Месеци наназад ги прашуваме, имаме официјално барање до Управата, за волја на вистината имавме формален одговор на три страници, без конкретни податоци и информации кои ги баравме директно, како можна подготовка, тврди Локвенец.
Утре, собраниската комисија ќе одржи седница, на чиј дневен ред ќе биде работата на УБК за 2015 и нивната програма за работа за 2016, како и Извештајот за работа на Агенцијата за разузнавање за 2015.
Според него, токму затвореноста на Управата е уште еден дополнителен повод за Специјалното обвинителство да ја продлабочи истрагата за „Тврдина“, во која тројца началници на УБК, екс-министерката на МВР Гордана Јанкуловска и уште едно лице вработено како документарка, се осомничени за злоупотребување на службена положба, пречекорување на овластувањата и фалсификување на документи.
Според СЈО, началниците во УБК испланирале, спровеле и ги уништиле трагите од акција за нелегално уништување на два система за прислушувањето во сопственост на УБК. Според СЈО, со ова, тие нанеле штета од 10 милиони евра на државата, а се направил лажен извештај, дека опремата е квалификувана како застарена и уништена во 2014, а била уништена во март 2015.
На барање на СЈО, судија на претходна постапка вчера изрече 30 дена притвор за првоосомничениот началник Горан Грујовски, додека за останатите осомничени, меѓу кои и Јанкуловска се очекува одлука на судот дали ќе се прифати барањето на судот да изрече мерка-претпазливост, односно одземање на патните исправи и забрана за напуштање на државата.