Денеска во Лондон започнаа четиридневните прослави во чест на 70-годишнината на тронот на кралицата Елизабета Втора. Официјалните прослави за платинестиот јубилеј започнаа со Trooping the Color, годишен воена парада со која од 1760 година се одбележува официјалниот роденден на суверенот. Се очекува кралицата да им се придружи на членовите на нејзиното семејство на балконот на Бакингемската палата на крајот на настанот, кога над палатата и насобраните граѓани пред балконот ќе протатнат 70 воени авиони на Кралското воздухопловство, наредени во свечена формација и во бојата на британското знаме.
Прославата на владеењето на Елизабета вклучува богослужба на благодарноста утре во катедралата Свети Павле во Лондон, концерт во Бакингемската палата во сабота и натпревар организиран од илјадници изведувачи од училишта и групи од секаде низ земјата во неделата попладне. Посебно внимание на денешниот дел од прославата привлекоа трите деца на принцот Вилијам и сопругата Кејт, Џорџ, Шарлота и Луис кои се возеа во кочија со нивната мајка и со сопругата на престолонаследникот Чарлс, Камила.
Во текот на викендот, се очекува да се одржат илјадници улични забави низ целата земја, како дел традицијата што започна со крунисувањето на кралицата во 1953 година.
96-годишната кралица е монарх со најдолго владеење во Британија и прва што успеала да се задржи седум децении на тронот. Јубилејот им дава шанса на многу луѓе – дури и оние кои често се рамнодушни кон монархијата – да размислуваат за состојбата на нацијата и огромните промени што се случија за време на владеењето на Елизабета.
Поранешниот премиер Џон Мејџор – еден од 14-те премиери од владеењето на кралицата – рече дека стоичкото присуство на монархот помогнало да се управува земјата во текот на децениите.„Кралицата го претставуваше нашето подобро јас повеќе од 70 години“, изјави тој за Би-Би-Си.
Во писмена јубилејна порака, кралицата им се заблагодари на луѓето во Британија и ширум Комонвелтот вклучени во организирањето на прославите. „За многумина, оваа прилика е прва можност за голем собир од почетокот на пандемијата. Продолжувам да бидам инспирирана од добрата волја што ми ја укажавте и се надевам дека наредните денови ќе дадат можност да размислувам за сето она што е постигнато во последните 70 години, додека гледаме на иднината со доверба и ентузијазам“, се вели во пораката.
Пристигнаа честитки од светските лидери. Францускиот претседател Емануел Макрон ја нарече Елизабета „златната нишка што ги врзува нашите две земји“ и една од „многу малкуте константи“ на меѓународната сцена. „Ти си наш пријател, толку близок сојузник, наш пример како треба да се биде на услуга на другите“, ѝ рекол Макрон на кралицата во видео порака на англиски јазик.
Во чест на јубилејот, од Калифорнија допатуваа и принцот Хари со сопругата Меган и нивните деца Арчи и Лилибет. (АП)