Јаго Аспас, напаѓач на Селта, е дополнително повикан во репрезентацијата на Шпанија за саботниот квалификациски натпревар со Македонија во Гранада за СП 2018. Селекторот Хулен Лопетеги беше принуден на ваков потег по неможноста да смета на Диего Коста од Челзи поради повреда. Шпицот на „сините“ од „Стемфорд Бриџ“ отпаѓа и за пријателскиот дуел на „фуријата“ во вторник на „Вембли“ против Англија.
Коста се здоби со повреда на препоните во последниот настап за Челзи против Евертон во премиерлигата минатиот викенд. Се ппојави на подготовките на шпанската селекција со надеж дека проблемот ќе биде навреме саниран, но прегледите и првите тренинзи покажаа дека не е така наивен како што делува. На Коста му е сугерирано да мирува во наредниот период, а дел од шпанските медиуми објавија дека Лопетеги ќе го ослободи од обврски и ќе го врати во Лондон на натамошно третирање на повредата.
Бразилскиот Шпанец дебитира за „фуријата“ во 2014 година. Од тогаш одигра 14 натпревари во кои постигна и четири гола.