Зоран Иванов
Во Србија се случи народ.
Не само денеска и вечерва.
Се случува цели 3.5 месеци.
Студенти, професори, ученици, адвокати, медицинари, земјоделци, глумци, сликари, …, граѓани.
Цели 3.5 месеци македонските ТВ и Веб портали, освен тука и таму по некој повремено, тие 3.5 српски бунтовни месеци против тамошниот корумпиран режим, нашиве журналисти ги отспаа.
Го премолчуваа упорно и посветено како катадневниот бунт да се случува некаде на друга планета, а не тука до нас во Белград, Нови Сад, Ниш, Смедерево, Краљево, Кругујевац, ….
На крајот, сепак, како под самосугестија на сопствената новинарска и уредничка совест или посебно на раздвижените влијателни странски медиуми на темата “српски протести“, дури по нешто завчера, вчера и конечно по посветено денеска, се подразбудија уредниците на нашите медиуми.
Се загнаа малку поупорно да информираат за стодневните српски демократски движења.
Но очигледно е дека со причини или од заблуди, сеедно, на некои овдешни медиуми не им се “допаѓаат“ Србија и Србите.
На други демократијата воопшто.
Трети како да немаат нерв за важните политички и општествени процеси.
Како и’ да е, кои и’ да се мотивите за таквиот медиумски игнор на толку атрактивните српски демократски случувања, ваквиот уреднички и уредувачки однос на најголемиот број македонски медиуми зборува за една неверојатно примитивна и непрофесионална журналистичка мустра.
А ги има за да информираат.
Само да известуваат за настаните, а не, поради субјективни сакања и несакања, да игнорираат настани, посебно случувања тука до на нашата граница.
Но, еве, се разбудија. Конечно.
Па, уредници, добро утро.