Мадрид се закани со укинување на автономијата на Каталонија доколку прогласувањето независност биде потврдено.

Денес шпанската влада одржа вонреден Совет на министри на кој се разговараше за наредните чекори во деликатното каталонско досие.

“Советот на министри одлучи утринава да испрати официјално барање до регионалната влада на Каталонија со кое ќе побара регионот да објасни дали е прогласена независност на Каталонија”, изјави шпанскиот премиер Мариано Рахој денес на пладне.

Тој додаде дека оваа барање е во рамките на членот 155 на шпанскиот Устав и е дел од процедурата за укинување на автономијата.

“Ако Пучдемонт го почитува законот тој ќе стави крај на овој период на нелегалност и несигурност. Ние сите се надеваме дека тој ќе стави крај на сегашната ситуација во Каталонија”, изјави Рахој додавајќи дека работи во интерес на сите Шпанци и Каталонци.

Рахој ги “твитна” и следните зборови кои се протолкувани и како закана за апсење на највисоките каталонски политичари кои се борат за независност:

“Сакаме да понудиме јасност и судска безбедност. Одговорот на каталонскиот регион ќе ги определи настаните во наредните денови.”Декларацијата за независност беше потпишана синоќа во Барселона а потпис ставија сите про-независност пратеници на каталонскиот парламент. Претседателот на каталонската Влада Карлес Пучдемонт смета дека ова е “симболичен акт”, изјави денес неговиот портпарол.

“Декларацијата треба да биде направена од страна на парламентот на Каталониа а тоа не беше случај. Ние потпишавме симболичен акт за нашиот ангажман за прогласување на независност”, изјави Жорди Турул.