Продлабочувањето на соработката со САД и зајакнување на нивното присуство е многу значајно во контекст на безбедносните предизвици по руската инвазија врз Украина, изјави денес шефот на дипломатијата Бујар Османи, по состанокот со Карен Донфрид, помошничка државен секретар на САД за европски и евроазиски прашања.
Османи се осврна и на блокадата врз евроинтеграциите на нашата земја. „Забрзувањето на евроинтеграциите е важно и за Северна Македонија, но и за целиот регион и за партнерите. Време е да се деблокира пристапувањето кон ЕУ, да се одобри преговарачката рамка и да се одржи првата меѓувладина конференција“, рече министерот за надворешни работи.
Суштинска вест од средбата е сепак закажаниот дијалог меѓу македонски и американски претставници, на 2 јуни во Вашингтон, на кој главна тема ќе биде продлабочувањето на стратешкото партнерство меѓу Северна Македонија и САД.
Веста ја објави министерот Османи, а претставничката на Стејт Департментот Донфрид рече дека очекува продлабочување на дискусиите меѓу двете влади за безбедносни и енергетски прашања како и споделување на информации.
Во контекст на нашето пристапување кон ЕУ, таа порача дека „САД изразуваат пофалби за покажаниот напор на Северна Македонија за северноатлантската иднина“, и дека Македонија заслужува брзо да напредува кон ЕУ.
„Сакаме што побрзо да се одржи меѓувладината конференција со Северна Македонија и Албанија. Веќе предолго се одолговлекува оваа конференција. Исполнивте тешки задачи и потребните реформи и заслужувате брзо да напредувате. Вашето пристапување ќе донесе поголема стабилност на Балкан и погол просперитет на Европа“, рече Донфрид. (С.К.)