Северна Македонија следниот месец ќе биде домаќин на голема конференција Преспа форум, што ќе се одржи од 16-18 јуни во Охрид, соопшти денес министерот за надворешни работи Бујар Османи.

Конференцијата, како што рече тој, се совпаѓа и со четиригодишнината од потпишувањето на Преспанскиот договор, а ќе се разговара за теми важни за денешницата.

„Оваа година конференцијата го носи името „Градењето на иднината на западниот Балкан во современата безбедносна архитектура“.  Во фокусот на дискусиите ќе доминираат актуелните теми, проектирани низ нашата регионална призма. Темата е што после војната во Украина“, посочи Османи.

На овогодинешното издание на Преспа Форумот за дијалог, потврдени се видни гости од регионот и пошироко. На самото отворање на Форумот ќе се обратат Претседателот со Европскиот Совет, Шарл Мишел, потсекретарката на Обединетите Нации за политички прашања – Розмари ди Карло како и актуелната генерална секретарка на ОБСЕ Хелга Шмит. Домаќин на отоврањето ќе биде Претседателот Пендаровски кој оваа година е покровител на настанот, а засега потврдено присуство имаат и Претседателите од Регионот, како што се Борут Пахор од Словенија, Вјоса Османи од Косово, Мило Ѓукановиќ од Црна Гора, како и Премерот на Косово, Албин Курти.

„Од регионален аспект, особено е важно што на Форумот ќе присуствуваат и клучните Специјални претставници за регионот од САД, ЕУ, Обединетото Кралство и Германија; соодветно – заменик помошник секретар на САД Габриел Ескобар, потоа Мирослав Лајчак, Сер Стјуарт Пич и Мануел Сарацин. Тоа ќе биде за прв пат токму сите четворица специјални претставници за регионот да бидат присутни на едно место, или на еден панел, и тоа во посета на регионот. Она што е особено важно за нас е дека сите четворица во рамките на Преспа форумот за дијалог, ќе учествуваат на состанокот – Б6, со министрите за надворешни работи од регионот. “, истакна  Османи.