Вчера беа пријавени 11 починати лица од Ковид-19 во земјава, што е најголем број на смртни случаи во едно деноноќие од почетокот на епидемијата пред четири месеци. Регистрирани беа и 185 нови позитивни случаи од 1.364 тестирања, а повеќе од половина (96) во Скопје. Бројот на дијагностицирани достигна 5.005.
Меѓу заразените се и градоначалникот на Скопје, Петре Шилегов и мајката на лидерот на ВМРО-ДПМНЕ, Христијан Мицкоски. Позитивни на Ковид-19 со полесна и средна клиничка слика, возрасни и деца, од денеска ќе се примаат и во Детската болница Козле.
Од 11. починати, осумммина биле пациенти во ГОБ „8 септември“ на возраст од 53 до 76 години. Три лица починаа во болниците во Куманово, во Штип и во Тетово, на 78, 63, односно 62 години. Со овие последни жртви на вирусот од вчерашниот билтен на Министерството за здравство, вкупниот број на починати во земјава достигна 233.
По Скопје како најголемо жариште, најмногу нови позитивни има во Струга (20), во Дебар (18), во Тетово (14), осум во Ресен, седум во Охрид, четворица во Штип, тројца во Кичево, по двајца новодијагностицирани во Куманово, Велес, Битола, Кавадарци, Гостивар и Свети Николе и по еден нов случај во Прилеп, Крива Паланка и Пробиштип.