Македонската фудбалска репрезентација се најде на 77. место на ФИФА ранг-листата, објавена денеска, што е пад за две позиции од претходното рангирање на Светската фудбалска организација.
„Црвено-жолтите“ го влошија својот пласман по двата нерешени исхода на мартовските контролни средби со Финска и со Азарбејџан, одиграни во Турција.
Од противниците на Македонија во групата од Лигата на нации најдобро котира Ерменија, која е на 98-то место, Лихтенштајн е 181-ви, а Гибралтар се наоѓа на 196-тото место на ранг-листата на ФИФА.
Лидер на ранг-листата е Германија, пред Бразил и Белгија. По нив во ТОП 10 следуваат: Португалија, Аргентина, Швајцарија, Франција, Шпанија, Чиле и Полска.
Следното рангирање Светската фудбалска федерација ќе го изврши на 17 мај.