„Македонски телеком“ ќе направи сè што е во негова моќ за да се зголеми соработката со Специјалното јавно обвинителство, изјави денеска Андреас Елснер, главниот извршен директор на компанијата на денешната прес-конференција организирана по повод надградување на 4Г-мрежата на мобилниот оператор со нова технологија.
Тој додаде дека веќе имале состаноци со СЈО.
„Можам да ве уверам дека како компанија на „Дојче телеком“, која ги спроведува политиките на „Дојче телеком“ и на „Маѓар телеком“ и законите во земјата, правиме сè да соработуваме со властите во земјата. Имавме состаноци со Јавното обвинителство, односно со СЈО и правиме сè што можеме за да ја зголемиме соработката затоа што нашиот интерес е чисто деловен. Почнавме оваа година и ќе продолжиме да соработуваме во истата насока – изјави Елснер, одговарајќи на новинарски прашања.